Со оглед дека се уште не е во целост јасно на кој начин имуниот систем на човекот реагира на новиот коронавирус, научници од 17 истражувачки центри во Велика Британија настојуваат да пронајдат одговори на прашањата за тоа колку трае имунитетот по заразата и зошто се јавуваат толку тешки случаи на инфекцијата. Новооснованиот британски имунолошки конзорциум (UK-CIC) вели дека со проучувањето на човечкиот имунитет ќе придонесе во борбата против епидемијата.
Проф. Мала Маини, виролог и имунолог на Универзитетскиот колеџ во Лондон, која го предводи истражувачкиот тим, вели дека “одговорот на нашиот имун систем на вирусот одредува како ќе реагираме кога со него ќе се заразиме“.
“Од тоа зависи колку сериозно ќе разболиме ако добиеме акутна инфекција, колку долго ќе бидеме заштитени по инфекцијата и како ќе реагираме на вакцината. Клучната реакција на вирусот е во нашиот имун систем“, вели проф. Маини.
Од појавата на вирусот, научниците се натпреваруваат во настојувањата што побрзо да откријат на кој начин нашиот организам реагира на инфекцијата.
Благите до умерени случаи на зараза со новиот коронавирус, проф Маини ги нарекува “школски пример по книга“ на одговорот на имуниот систем.
“Се чини дека сите клучни делови на тој сложен имун систем во овој случај, заедно добро функционираат“, смета таа.
ПОТЕШКИ СЛУЧАИ
Но, конзорциумот на стручњаци се надева дека ќе успее да ја открие улогата на имуниот систем и потешките случаи на зараза.
Се бараат огровори и на прашањето за тоа колку долго трае имунитетот по “прележаната“ инфекција. Оваа недела научниците од Хонг Конг евидентираа прв случај на повторна зараза кај еден пациент.
Проф. Пол Мос, еден од членовите на конзорциумот вели дека се работи за “прв случај меѓу милиони, што секако треба да се земе предвид за да бидеме свесни колкав е тоа размер“.
Присутна е и загриженост дека имунитетот на коронавирусот со тек на време постапно опаѓа. Но, фактот дека заразеното лице од Хонг Конг за време на втората инфекција не покажувала никакви симптоми, укажува на тоа дека стекнатиот имунитет може да биде ефикасен во спречување на повторен развој на болест КОВИД-19.
Научниците истражуваат и дали некои луѓе едноставно се имуни на вирусот, дури и ако никогаш не биле изложени на него.
Неколку претходно спрповедени студии покажале дека претходна изложеност на некој од коронавирусите кои предизвикуваат обична настинка, му овозможува на имуниот систем да го препознае и новиот коронавирус.
Проф. Мос вели дека клучно е да се пронајде одговор на следново прашање – може ли зарази со други, поблаги коронавируси да не заштитат да заболиме од КОВИД-19 или болеста токму поради тоа ќе биде уште потешка.
