Истражувањето спроведено на Универзитетите Colorado Boulder и Haifa, а објавено во списанието „Proceedings of the National Academy of Sciences“ открива дека колку повеќе емпатија партнерот чувствува спрема својот партнер, кој е во болка, толку повеќе нивните мозочни бранови ќе се синхронизираат. А колку повеќе се синхронизираат, толку повеќе болките ќе исчезнат.
Кога ќе ја фатите за рака личноста која ја сакате, а поминувате низ болка, не само што ќе се синхронизираат вашето дишење и отчукувања на срцето, туку ќе се синхронизираат и мозочните бранови.
Авторот на истражувањето Павел Голдштајн истакнал дека „имаме развиено многу начини на комуникација во современиот свет и имаме се помалку и помалку физичка интеракција, но ова истражување покажува колкава е силата и важноста на физичкиот контакт“.
Павел и останатите научници го проучувале феноменот на „меѓусебна синхронизација“ на 22 двојки на возраст од 23-32 години, кои биле заедно најмалку една година. Со помош на ЕЕГ уред ја мереле нивната мозочна активност додека ги ставале да поминуваат низ неколку двоминутни сценарија. Тестирањето вклучувало седење заедно, но без допир, седење заедно со држење за раце и седење во одвоени простории.
Синхронизацијата на мозочните бранови била измерена како највисока во сценариото кога двојките се држеле за раце додека жената била во болки. Тестовите покажале дека колку повеќе мажот сочувствува со болката на жената, толку повеќе се синхронизира со нејзината мозочна активност.
