Група научници потврдила дека четиригодишно дете од Милано преболело коронавирус на 21 ноември минатата година, пренесува италијанскиот весник Ла Република.
Се започнало со кашлање и се чинело дека станува збор за настинка која е вообичаена за тоа време од годината, но по девет дена, родителите детето го однеле на ургентен оддел оти почнало да повраќа и отежнато да диши. Следниот ден му се појавиле промени на кожата. Лекарите се посомневале на сипаници, па на детето му земале брис. Тестот бил негативен, а детето набрзо после тоа се опоравило.
Тој тест, како и останатите тестови на сипаници, се чувал во замрзнувач на минус 80 степени во универзитетска лабораторија. Група научници одлучила да провери има ли меѓу нив и позитивни на новиот коронавирус, за да проверат дали вирусот се ширел и претходно. Биле тестирани 39 примероци кои потекнуваат од септември 2019 до февруари 2020. Единствено брисот на детето се покажал позитивен. Научниците утврдиле дека се работи за сој на вирусот од Вухан.
