Истражување спроведено на паценти во Вухан, хоспитализирани во јануари минатата година, покажало дека заморот, депресијата и проблемите со спиењето може да бидат присутни кај болните од КОВИД-19 со месеци откако ќе бидат отпуштени од болница со негативни наоди.
АНКСИОЗНОСТ И ДЕПРЕСИЈА
Симптомите на коронавирусот вклучуваат депресија и проблеми со функционирањето на разни органи, може да се задржат со месеци по почетната инфекција, открило новото истражување на кинеските научници. 63 проценти од 1733 пациенти примени во болницата Jin Yin-Tan во Вухан на самоиот почеток на пандемијата во јануари 2020, во мај истата година се уште чувствувале замор.
Од нив, 26 проценти имале проблеми со спиењето, а една третина од испитаниците имале симптоми на бубрежни нарушувања, вклучувајќи и таложење на отпадни материи во крвта.
Д-р Чао Бин од Japan Friendship болницата во Пекинг предупредува дека таквите резултати од истражувањето упатуваат на зголемена потреба за следење на пациентите и по отпуштањето од болница. Во истражувањето се наведува и ниското ниво на антитела кај испитаници, што значи дека имуниот систем ќе може да спречи реинфекција само кусо време.
За стручното списание Lancet, д-р Чао Бин вели дека се потребни долготрајни истражувања на поголем број заболени за да се стекне целосна слика за здравствените последици од КОВИД-19.
“Нашите досегашни анализи покажуваат дека повеќето пациенти продолжуваат да живеат барем со една последица од вирусот и по излегувањето од болница, што упатува на зголемена потреба за следење на пациентите и по отпуштање од болничката установа“, истакнува д-р Бин.
Што се однесува до антителата, тој вели дека кај таквите пациенти постои голем ризик од реинфекција и поради тоа тие треба да се набљудуваат, додавајќи дека една четвртина од испитаниците страдале од депресија и анксиозност речиси половина година откако биле примени на лекување во болница.
