Се побројни се доказите дека дебелината сама по себе ја зголемува веројатноста од потешки компликации на заразата со новиот коронавирус. Студија во која биле вклучени над 5.200 заразени, а меѓу нив 35% обезни лица, покажала дека веројатноста за хоспитализација расте со поголем индекс на телесната маса (BMI), дури и кога се одземаат останатите состојби кои ги изложуваат на поголем ризик лицата со прекумерна телесна тежина.
Лице се смета за обезно, односно со прекумерна телесна тежина или дебело, ако индексот на телесна маса е поголем од 30. Екстремната дебелина кога BMI е поголем од 40, особено ја зголемува веројатноста од развој на најтешки форми на КОВИД-19.
Научниците велат дека веројатно постојат повеќе причини поради кои дебелите лица потешко се носат со КОВИД-19, болест која може да ги нападне белите дробови. Вишокот масти, на пример, може да ја ограничат способноста на белите дробови да се шират и да дишат.
Друг проблем може да се претставува хроничното воспаление, кое често доаѓа со дебелината. Воспалението е природен начин на борба на организмот со вирусот. Но, хроничното воспаление може да ја поткопа одбранбената сила на органзимот кога ќе се појави вистинска закана.
“Тоа е додавање масло на оган“, вели д-р Дариуш Мозафариан од факултетот за нутритивна наука во Бостон.
Распределбата на маснотии во телото исто така може да игра одредена улога. Мажите, на пример, имаат најмногу маснотии околу стомакот, а тој вид маснотии е поврзан со производство на хормони кои можат да придонесат за потешка форма на болеста. Ова може да објасни и зошто дебелите мажи се поподложни на развој на болеста отколку жените.
Научниците исто така испитуваат дали има нешто посебно во самиот коронавирус што го прави поопасен за дебелите луѓе. Вирусот влегува во клетките со „закачување“ на рецепторите на површината на одредени клетки. Постојат многу вакви рецептори на масните клетки и експертите испитуваат дали тоа ги прави „добро гнездо за вируси“, вели д-р Франсоа Патоу од Универзитетот во Лил, еден од авторите на истражувањето за поврзаноста помеѓу дебелината и тешката форма на КОВИД-19.
Компликации може да се појават и кај оние кои се хоспитализирани. За да им помогнат на заболените да дишат полесно, лекарите ги вртат на стомак. Кај дебелите луѓе, ова е потешко, па најверојатно ќе завршат на респиратор.
“Едноставно потребна им е помош од машини за дишење“, вели д-р Дејвид Кас од Универзитетот Џон Хопкинс, исто така автор на студија за дебелината и КОВИД-19.
И уште една загриженост – вакцината против новиот коронавирус нема да биде еднакво ефикасна за дебелите луѓе, како што е случајот и за вакцината за грип. Зошто е тоа така, не е познато, но една можност е дека дебелината штети на активирањето на имунитетот, неопходно по вакцинацијата.
