Научниците од Универзитетот Кјото во Јапонија ја испитувале издржливоста на новиор коронавирус (SARS-CoV-2) и вирусот на грип тип А (IAV) во мешавина на слуз од горните дишни патишта и на површината на човечката кожа. Нивното откритие дополнително потврдува дека новиот коронавирус е исклучително тврдокорен во однос на вирусот на грип.
По неколку спроведени анализи јапонските стручњаци дошле до сознание дека двата вируса се значително помалку се задржуваат на површината на кожата отколку на останатите неоргански површини (како метал, пластика, стакло), но коронавирусот значајно подолгоможе да преживее на кожата од вирусот на грип.
Тие откриле дека SARS-CoV-2 на кожата во просек преживува девет часа, додека IAV на кожата на човекот во просек преживува 1,82 часа.
Научната студија објавена во списанието Clinical Infectious Diseases покажала и колку долго двата вируса може да преживеат во слузта на горните дишни патишта.
Новиот коронавирус може да преживее до 11 часа во слузта, додека IAV станува неактивен по 1,69 час.
Во истото истражување се тестирала и дезинфекциската ефикасност на 80-процентиот етанол во борба против овие два вируса и утврдено е дека средството за дезинфекција е многу ефикасно. И едниот и другиот вирус ги уништил во рок од 15 секунди.
Можноста на вирусот SARS-CoV-2 да преживее на човечката кожа го зголемува ризикот од инфекција во контакт со други лица, па затоа научниците во заклучокот наведуваат дека правилната хигиена на рацете е исклучително важна за да се спречи ширењето на коронавирусните инфекции.
