Поголем е ризикот од појава на крвни згрутчувања во мозокот при инфекција со коронавирус, отколку од вакцината против КОВИД-19, објавија британските научници.
Извештаите за многу ретка церебрална венска синусна тромбоза (CVST) поврзани се со примање на вакцините АстраЗенека и Џонсон и Џонсон. Поради тоа, во САД оваа недела на краток период е стопирана употребата на вакцините на Џонсон и Џонсон, додека не се истражи поврзаноста со крвните згрутчувања, додека Данска престана да вакцинира со АстраЗенека.
Британските и европските регулатори истакнаа дека придобивките од вакцините ги надминуваат ризиците.
Истражувањето спроведено на 500.000 ковид пациенти открило дека CVST се појавила кај 39 лица на милион заразени, наведуваат научниците.
Резултатите биле споредени со податоците на Европската агенција за лекови (ЕМА) според кои пет лица на еден милион, пријавиле CVST по примање на вакцината на АстраЗенека.
Научниците наведуваат дека ризикот од тромбоза е осум до 10 пати поголем по зараза со коронавирусот, отколку од постоечките вакцини против КОВИД-19.
“Се чини дека ризикот од појава на тромбоза по КОВИД-19 е значајно поголем отколку што бил по примањето на оксфордската вакцина АстраЗенека“, вели Максим Такет од Оксфорд.
Тој вели дека стапката на смртност од CVST изнесувала околу 20 проценти без оглед дали се појавила по инфекција со коронавирус или по примање на вакцина, што укажува дека крвните згрутчувања се главниот ризик фактор.
Научниците истакнуваат дека КОВИД-19 повеќе е поврзан со мозочни удари, отколку со CVST и дека актуелната дискусија за зголемиот ризик од тромбоза ја испушти од предвид можноста за појава на потешка форма на болеста.
“Важноста на ова откритие е што враѓа на фактот дека ова е навистина ужасна болест, со низа појави вклучувајќи и зголемен ризик од CVST“, вели Џон Гедес, директор на истражувачкиот центар.
