Новиот коронавирус мутирал и во светот доминира неговата варијација која, според заклучокот на истражувачките тимови од Америка и од Велика Британија е од три до шест пати позаразана од оригиналниот сој на овој вирус со потекло од Кина. Варијацијата која денес ја предизвикува пандемијата со коронавирус, наречена D614G, покажала поголема заразност, поголемо вирусно оптоварување на горниот респираторен систем кај заболените, но засега не и потешки симптоми на болеста КОВИД-19.
Такви заклучоци произлегле од научно истражувачката студија објавена во списанието Cell, а го спровеле стручњаци од четири научни институции од САД и од Велика Британија. Ова тврдење предизвика полемики уште во мај кога беше предистражувачпки објавено, а со неодамнешниот пораст на бројот на заболени во многу земји, како и кај нас, почна научна расправа дали коронавирусот се врати поинаков и поопасен или вирусот е ослабен. По првичните критики, науката продолжи да го истражува овој сој на новиот коронавирус, и беа анализирани податоци од 999 пациенти хоспитализирани во Велика Британија поради КОВИД-19.
Со анализата научниците потврдија дека пациентите со споменатата варијанта на вирусот, во себе имале повеќе вирусни честички, но не и посериозна клиничка слика, односно потешки симптоми на болеста.
“Мутациите на вирусите е нешто кое постојано се случува, а овој пример на промена на аминокиселината на положба 614 на шилецот на гликопротеинот е типичен. Додека оваа варијанта на почетокот на епидемијата беше исклучително ретка, сега на некои, но не и на сите места во светот, стана доминантна. Она што го покажуваат објавените анализи е дека оваа нова варијанта произведува поголема количина на вирусни честички, и најверојатно поради тоа и побрзо и поуспешно се шири, но дека не предизвикува потешко заболување. Дали причината за поголема зачестеност на благи форми на болеста е ширењето на таа нова варијанта на вирусот или станува збор за сезоналност на вирусот, во овој момент е тешко да се знае“, коментира проф. д-р Гордан Лауч, напоменувајќи дека овој сој D614G се појавил во Европа, но во март неговата зачестеност била многу мала.
Во земјава, во МАНУ се спроведува проект за секвенционирање на геномите на вирусите кои што се наоѓаат кај нас , за да се видат субтиповите на вирусот, особено во делот на лекување на заболените пациенти, како и за следење на начинот на пренесување на заразата и следењето на тие нови кластери.
Според академик Александар Димовски од Центарот за генетско инженерство и биотехнологија „Ѓорѓи Ефремов при МАНУ целта е научниците да видат дали ако постојат различни субтипови, истите може да се поврзат со различна клиничка манифестација на болеста, односно дали одделни субтипови се засилени со поблага клиничка слика на болеста или некои со потешка манифестација на болеста.
„Сега сме во фаза на колектирање на примероци. Тоа е договорено како проект на МАНУ, разговарано е и со Инфективната клиника, со Институтот за јавно здравје. Се собираат специфичните примероци кои можат да ни дадат одговор на овие прашања. Ние сме спремни, јас верувам дека за една-две недели ќе можеме тие едно 100-200 генома да ги секвенционираме и да ги најдеме одговорите. И друга една работа што сакаме да видиме – дали со тек на време одреден кластер мутира, кој е степенот на мутација кај нашата популација. Тоа пак, е битно да можете да предвидите од аспект на развој на вакцина, колку често се рејавуваат тие промени. Само по себе, можеби не е доволен бројот на примероци, меѓутоа сметавме дека имајќи го капацитетот, можеме да придонесеме во онаа светска база на тие податоци. Колку повеќе собираат, тие добиваат поцврсти докази“, вели во интервујот за порталот “Сакам да кажам“, проф. Димовски.
