Во Тајван или Јужна Кореја луѓето ќе ве прашаат која крвна група сте, а тоа не треба да ве зачудува. Исто како што ширум светот ќе ве прашаат што сте во хороскоп за да откријат нешто за вашиот карактер, така во азискиот свет се верува дека крвната група може да го опише човекот. Иако за ова може да се полемизира до бесконечност, научните студии утврдиле дека крвната група може да каже нешто повеќе за здравствените ризици на луѓето. Според направените истражувања, ова се некои од клучните карактеристики за одредена крвна група.
Памтење
Според една неодамнешна студија направена од страна на Универзитетот во Вермонт, личностите со АБ крвна група имаат дури 82 отсто поголеми шанси да се соочат со проблеми со памтењето, кои во перспектива би можеле да доведат до деменција.
Болести на срцето
Крвната група може да предупреди дека кај некои личности може да дојде до одредени здравствени проблеми како што се инфаркт, мозочен удар или тромбоза. Студијата од Харвард покажала дека крвните групи кои не се нулта имаат најмалку 60 проценти поголема шанса за развој на опасни крвни згрутчувања, а со тоа и зголемен ризик од коронарни болести. Меѓутоа, како и во повеќето случаи, начинот на живот и препишаните лекови може да имаат многу поголемо влијание за појава на овие проблеми од самата предиспозиција за нив.
Гастроинтестинални проблеми
Луѓето со крвна група А имаат поголема веројатност да добијат рак на желудникот, како што кај личностите од нулта крвна група многу почесто отколку кај другите се развива чир на дванаесетпалечно црево. Вонредниот професор по епидемиологија на институтот Каролинска во Шведска Густаф Едгрен вели дека различните видови крв се подложни на различни бактериски инфекции. Тој нагласува дека разликата во ризикот меѓу нив за тие инфекции е премала за да има какви било сериозни последици, а дека најважно е да се одбегнува пушењето и прекумерната консумација на алкохол.
Рак
Нулта крвната група е поврзана со помал ризик од добивање низа видови карцином, вклучително и рак на дебелото, панкреасот и желудникот.
Дијабетес
Истражувањето спроведено врз 82 000 жени од 2015 година открило дека личностите со крвни групи А и Б се склони да развијат дијабетес тип 2.
Маларија
Луѓето чија крв е нулта крвна група повторно се во предност во однос на другите и кога станува збор за маларијата затоа што во нивната крв постои природна заштита, дури и од најлошите видови на оваа болест која ја пренесува комарецот. Истражувачите откриле дека така е затоа што протеинот кој го лачи комарецот има тенденција да се врзува за крвните зрнца од групата А, но не и за нулта.
Вегетаријанска и месна исхрана
Постојат многу расправи за тоа дали одредена исхрана во склад со одредена крвна група има каква било научна основа или не. Суштината на голем број објавени текстови на интернет и книги кои се бават со оваа тематика е во тоа дека на личностите со крвна група А им се препорачува да бидат вегетаријанци, додека оние со нулта крвна група треба да јадат месо.
