Влошувањето на квалитетот и должината на сонот со текот на времето доведува до двојно или тројно зголемување на проблемите со болките.
„Спиењето и болките се двата најголеми здравствени проблеми на денешницата“, истакнува шефот на истражувањето Естер Ефолили од Универзитетот Варвик во Ковентри. Таа додава и дека е познато оти болката го попречува сонот, а ново истражување покажува дека „ефектот на сонот врз болката често е поголем од оној на болките врз сонот“.
Пореметувањата на спиењето придонесуваат за проблемите во процесот во кој личноста се носи со болките. Научниците проучиле 16 истражувања кои опфаќаат повеќе од 60 000 возрасни личности од десет земји. Настојувале да утврдат каков бил сонот на испитаниците на почетокот од истражувањето и какви биле долгорочните влијанија од промените на квалитетот на сонот на болката, имунитетот и физичкото здравје.
Половина од испитаниците биле следени најмалку четири и пол години. Севкупното влошување на квалитетот и траењето на сонот резултирало со пореметен одговор на телата на бактериите и вирусите, имало повеќе воспаленија, нивото на хормонот кортизол било повисоко, како и нивоата на другите биомаркери поврзани со болката, заморот и полошото здравје. Истовремено, научниците не откриле никаква врска меѓу подобриот сон и намалувањето на болките или симптомите на артритисот, иако откриле дека подобрувањето на квалитетот на сонот е поврзано со подобро физичко здравје.
