Во почетокот на април Елијан Грејс уживала брцкајќи се во базенот во домот на нејзината баба и дедо во Сарасота, Флорида. Девојчето си играло со пластична цевка за бањање т.н. „pool noodle“.
„Како и многу деца, таа дувала на едниот крај на цевката, а водата излегувала на другата страна. Но случајно устата ја ставила на цевката во моментот кога некој од другата страна дувнал, предизвикувајќи водата директно да влезе во грлото на девојчето“, го опишува инцидентот Лејси, мајката на Елијан на Фејсбук.
Детето веднаш се повратило и 30 минути по настанот било сосема нормално. Но, следниот ден добила температура која се повторувала и во наредните денови, па нејзината мајка ја однела на лекар.
„Нејзиното срце биеше многу брзо, нивото на кислород беше ниско и кожата почна да и добива виолетова боја. Лекарите се сомневаа на некаква хемиска инфекција“
Рендгенската снимка на белите дробови покажала воспаление и инфекција и на крајот и било дијагностицирано т.н. „суво давење“ – состојба која се јавува кога некој преку носот или устата ќе вдиши вода, која потоа завршува во белите дробови.
Непосредно по инцидентот, Лејси се сетила на еден новинарски напис за момче кое поради слична несреќа починало по седум дена. „Се сетив на таа приказна и побрзав во болница што ја спаси мојата ќерка. Ако чекавме, можеби ќе ја изгубевме“, пишува Лејси.
За разлика од „обичното“ давење што може да се случи на базен, река или море, „сувото или секундарно давење“ почнува да се манифестира дури неколку дена откако лицето вдишило вода. Таквата состојба е најчеста кај мали деца.
Симптомите на „суво или секундарно давење“ се потешкотии во дишењето, долготрајна кашлица, поспаност, летаргија и повраќање
Д-р Томас Вотерс од Одделот за Итна помош во болницата во Кливленд изјавил дека состојбата може да предизвика грчеви во мускулите задолжени за дишење. „Детето се обидува да диши преку запушените гласни жици што може да доведе до воспаление, оток и појава на вода во белите дробови“.
Лејси вели дека е многу благодарна што прочитала статија за несреќното момче, бидејќи така знаела што мора да направи кога истото и се случило на нејзината ќерка.
„Докторите ми рекоа дека е вистинска среќа што сме ја донеле на време, бидејќи нивото на кислород во крвта паднал на многу ниско ниво. Во исто време, Елијан изгледаше како да спие. Не изгледаше како да се мачи“.
Девојчето е отпуштено од болница и сега се опоравува дома.
Семејство Грејс сака да ја сподели оваа приказна со јавноста за да ги предупреди и другите родители: „Ако мислите дека нешто не е во ред, одете на лекар. Во најдобар случај, нема да има ништо и ќе ве испрати дома. Но, бидете свесни за тоа што се може да се случи“, порачува Лејси Грејс.
