Честото консумирање алкохол и напитоци засладени со шеќер се смета за сериозен „виновник“ за зголемување на телесната тежина. Но што би се случило кога еден пијалак, кој вообичаено го пиеме, би го замениле со обична вода? Тим на научници од Шпанија се обиделе да го откријат токму ефектот на оваа измена.
Во период од 8,5 години научниците ги следеле податоците за исхраната на 15 765 возрасни испитаници кои на почетокот на истражувањето не биле дебели. Особено предвид било земено присуството на 17 различни напитоци во исхраната, меѓу кои се пивото, виното, жестоките пијалаци, кафето, диеталните напитоци, пијалаците со дополнителен шеќер, млеко, милкшејк, свежи овошни сокови, флаширани сокови и вода. На крајот од периодот на истражувањето 873 од испитаниците се здебелиле.
Научниците со употреба на математички методи пресметале дека ризикот за развој на дебелина се намалува за 20 проценти доколку некој секој ден место пиво решава да испие чаша обична вода. Доколку со вода се замени некој пијалак со дополнителен шеќер, споменатиот ризик се намалува за 15 отсто. Овој ефект е забележан само за овие два вида пијалаци, но не и за кафето, виното, свежо цедените овошни сокови и сл.
