Неодамнешното истражување на група австралиски научници покажало дека никотинамидот, облик на витамин Б3, може да го намали ризикот од рак на кожа. Резултатите од претходни научни студии веќе укажале на тоа дека никотинамидот може да ја поттикне репарацијата на ДНК и да ги ублажи оштетувањата настанати од УВ зрачењето. Во добри извори на никотинамид (ниацинамид) спаѓаат месото, рибата, јаткастите плодови и печурките.
Во споменатото истражување учествувале 386 испитаници кои во изминатите 5 години имале два хистолошки потврдени немеланомски тумори на кожата. Половина од учесниците во текот на една година секојдневно земала по 500 мг никотинамид, а другата половина (од контролната група) добивала плацебо. На крајот од истражувањето се покажало дека кај испитаниците кои добивале никотинамид појавата на нови немеланомски тумори на кожата била помала за 23 отсто отколку кај контролната група. Врз основа на овие резултати авторите на студијата веруваат дека никотинамидот, освен во превенцијата од немеланомски тумори на кожата, би можел да помогне и во превенцијата од меланом кај личностите со висок ризик од оваа малигна болест.
Освен адекватниот внес на витамин Б3, ограничувањето на консумирањето алкохол, исто така, ги намалува шансите за појава на рак на кожата. Една студија покажала дека ризикот од карцином на базалните клетки се зголемува за 7 проценти, а ризикот од карцином на сквамозните клетки за 11 проценти со секоја додадена чаша вино или пиво во текот на денот.
Се разбира, со придржување до основните насоки кога е во прашање изложувањето на сончевите зраци, во превенцијата од рак на кожа во голема мера помага и соодветната заштита од сонце – уште едно истражување спроведено во Австралија покажало дека личностите кои секојдневно користат креми и лосиони со заштитен фактор имаат за 50 проценти ризик од меланом и за 40 отсто од карцином на сквамозните клетки во споредба со личностите кои оваа заштита ја користат само повремено. Се препорачува употреба на креми со најмал СПФ 30 фактор и тоа во доволно количество – отприлика по кафена лажичка за рацете, потоа лицето, вратот, торзото и грбот и по две лажички за секоја нога.
