Се проценува дека секоја трета возрасна личност повремено има проблем со несоницата. Освен навиката како што е одложувањето на заминувањето в кревет и будењето приближно во исто време, но и одбегнувањето кофеин во доцните попладневни и вечерни часови постојат уште фактори кои ни помагаат подобро да се наспиеме.
Кога станува збор за исхраната би било добро секојдневно да се консумираат помали количества јаткасти плодови (30 до 50 г). Јаткастите плодови содржат магнезиум и селениум кои се поврзуваат со помирниот сон. Едно истражување покажало дека кикиритките ги зголемуваат делта брановите во мозокот, кои се поврзуваат со длабок сон (период од сонот кој најефикасно го опоравува телото). Исто така, фстаците ги засилуваат гама брановите во мозокот кои се поврзуваат со РЕМ фазата од сонот, фаза во која сонуваме.
Квалитетот на воздухот во собата во која се спие, исто така, влијае на тоа како спиеме. Имено, едно истражување покажало дека луѓето кои спијат покрај отворен прозорец подобро спијат, како и дека добрата проветреност на собата т.е. пониското ниво на јаглендиоксид во воздухот придонесуваат за подобар квалитет на сонот.
Интересно е и тоа дека домашните миленици специфично влијаат на квалитетот на сонот. Во неодамнешната студија, научниците го испитувале ова влијание кај 40 возрасни испитаници и нивните кучиња. Истражувањето траело 7 дена (т.е. ноќи) и било утврдено дека луѓето чии кучиња спијат со нив во собата, спијат поефикасно. Под ефикасност на сонот се подразбира односот на вкупното траење на сонот и времето поминато во кревет – кај сопствениците на кучиња ефикасноста на сонот изнесувала 83 проценти, што е прилично добар резултат. Авторите на студијата сметаат дека овие испитаници се чувствуваат попријатно и посигурно кога нивниот миленик спие во близина. Од друга страна, во истата студија е утврдено дека навиката да го пуштате домашниот миленик да спие со вас во кревет и не е толку добра и неповолно влијае на квалитетот на сонот.
