Одредени промени на животните навики можат во голема мера да го намалат ризикот од мозочен удар, покажуваат резултатите од новото американско истражување. На пример од 23 000 испитаници на возраст од 45 години и повеќе, тим на стручњаци ја пресметал проценката на ризик од мозочен удар. При тоа се воделе според препораките на Американското здружение за здраво срце кое наведува седум фактори кои се важни за здравјето, а тоа се: активен живот, контрола на холестеролот, здрава исхрана, контрола на крвниот притисок, одржување на здрава телесна тежина, контрола на шеќерот во крвта и непушење.
Во тек на пет години, колку што траела студијата, кај испитаниците се забележани 432 случаи на мозочен удар. Сите седум фактори при тоа играле важна улога во предвидување на ризикот од мозочен удар, но најважен бил крвниот притисок, односно неговото ниво.
„Во споредба со лицата со лоши резултати од мерење на крвниот притисок, лицата со идеален притисок имале за 60 % помал ризик од мозочен удар во иднина“, објаснува д-р Мери Кушман, професор на медицинскиот факултет Вермонт.
Таа и нејзиниот тим колеги заклучиле и дека лицата кои не пушат или престанале со оваа навика повеќе од една година пред почетокот на студијата, имале за 40 % помал ризик од мозочен удар.
За потребите на студијата, стручњаците оцените на испитаниците за седум категори на здрав живот ги поделиле на три групи: недоволна оцена (нула до четири поени), просечна (пет до девет поени) и оптимална (10 до 14 поени). Секое зголемување на оценката за еден поен било поврзано со осум проценти помал ризик од мозочен удар. Лицата со најдобри, оптимални резултати имале за 48 % помал ризик од лицата со лоши резултати, додека кај лицата со просечни резултати е забелеен 27 % помал ризик од мозочен удар.
