Во текот на денот во повеќе наврати направете пауза од 3 минути за време на која ќе се концентрирате на дишењето. Ставете ја раката на стомакот и вдишете додека броите до 6. За време на вдишувањето не би требало да го движите/ширите градниот кош, туку стомакот би требало да се движи кон напред (ако седите) или нагоре (ако лежите). Потоа издишете лесно додека броите до 3. На овој начин се подобрува подвижноста на дијафрагмата, мускул кој има клучна улога во дишењето, се врши подобра размена на гасови и се подобрува контролата на емоциите.
Свесно одете – оваа техника претставува вид на активна медитација за време на која посебно внимание се насочува на самата активност на одење. Најпрво треба да се постигне свесност на контактот на деловите од стапалата со подлогата за време на чекорењето (петата, сводот на стапалата, прстите). Потоа треба да станеме свесни за тежината на телото додека одиме по подлогата. Посветете постепено внимание и на нозете, т.е. на мускулите кои се активираат за време на одењето. Потоа вниманието насочете го на горниот дел од телото – односно како градниот кош и рамената учествуваат во одењето, а потоа и како рацете слободно се движат. На крајот станете свесни за тоа дека целото тело се движи додека одите и останете свесни за тоа уште неколку минути.
