Глаукомот доведува до оштетување на очниот нерв и на крајот до губење на видот. Оштетувањето на очниот нерв е најчесто предизвикано од зголемен очен притисок.
Глаукомот е втора најважна причина за слепило. Се нарекува и тивок крадец на видот, бидејќи го оштетува видот постепено, па може да се случи и да не се забележи губење на видот се додека болеста не биде во напредната фаза. Најчестиот вид на глауком, примарен глауком на отворен агол, нема забележителни знаци и симптоми освен постепено губење на видот.
Глаукомот може да се развие на која било возраст, но е шест пати почест кај луѓето постари од 60 години!
Раната дијагноза и лекување може да го намалат или спречат оштетувањето на очниот нерв и да го ограничат губењето на видот, кое е поврзано со глаукомот. Затоа е важно редовно да се контролира видот и да се мери очниот притисок кај офталмолог
Бидејќи хроничните форми на глауком може да го уништат видот пред да се појават какви било знаци или симптоми, обратете внимание на следните фактори:
ЗГОЛЕМЕН ВНАТРЕШЕН ОЧЕН ПРИТИСОК. Ако вашиот очен притисок е повисок од нормалниот, имате зголемен ризик за развој на глауком. Меѓутоа, имајте на ум дека болеста не се развива кај сите лица кои имаат зголемен очен притисок.
ВОЗРАСТ. Сите лица постари од 60 години имаат зголемен ризик за глауком.
ГЛАУКОМ ВО СЕМЕЈСТВОТО. Ако во вашето семејство некој веќе страдал од глауком, имате зголемен ризик од појава на болеста
Глаукомот може да има и генетска поврзаност, што значи дека постои грешка во еден или повеќе гени, па одредени лица ќе бидат поподложни на оваа болест. Обликот на млад примарен глауком на отворен агол е несомнено поврзан со генетски абнормалности.
МЕДИЦИНСКИ СОСТОЈБИ. Дијабетесот и хипотироидизамот го зголемуваат ризикот од развој на глауком.
ДРУГИ СОСТОЈБИ НА ОЧИТЕ. Тешките повреди на очите може да го зголемат очниот притисок. Во случај на повреда, може да се дислоцира и леќата на окото и така да се затвори аголот. Други фактори на ризик вклучуваат одвојување на мрежницата, тумори на окото и воспаленија, како што се хроничен увеитис и иритис. Некои видови на операции на окото, исто така, може да бидат тригер за секундарен глауком.
МИОПИЈА. Кратковидноста, што обично значи дека сликата на одалечените предмети ви е матна, доколку не носите очила или леќи, го зголемува ризикот од глауком.
ДОЛГОТРАЈНА УПОТРЕБА НА КОРТИКОСТЕРОИДИ. Долготрајната употреба на кортикостероиди, го зголемува ризикот од развој на секундарен глауком. Ова особено се однесува на употребата на кортикостероидни капки за очи.
