Такоцубо кардиомиопатија, исто така позната како синдром на скрешно срце е привремена состојба на срцето која може да биде предизвикана од екстремен емоционален или физички стрес. Состојбата прв пат е опишана 1990 година во Јапонија, а зборот “такоцубо“ доаѓа од името на сад што јапонските рибари го користеле за ловење октоподи.
Се јавува кога левата комора на вашето срце, која е главна комора за пумпање крв, ќе ја промени формата и ќе се зголеми, поради што слабее срцевиот мускул и тоа влијае на неговата способност за пумпање крв. Кога тоа ќе се случи, левата комора се изобличува така што развива тесен врат и округло дно, што ја прави налик на споменатата замка за октопод.
Истражувањата покажуваат дека синдромот на скршено срце почесто ги погодува жените отколку мажите, при што повеќе од 90 проценти од пријавените случаи се јавуваат кај жени на возраст меѓу 58 и 75 години.
Стресните фактори поврзани со оваа состојба може да вклучуваат загуба на сакана личност, сериозна несреќа, природна катастрофа како земјотрес или ненадејна болест.
Научниците веруваат дека во моменти на силна болка или тага, хормоните на стрес како адреналинот можат да се зголемат и да го зашеметат срцето, што резултира со промени во клетките на срцевиот мускул или коронарните крвни садови или и двете. Овие промени ја ограничуваат левата комора во правилните контракции, што доведува до нарушување на пумпањето на крвта.
Сепак, симптомите на Такоцубо кардиомиопатијата речиси и не се разликуваат од срцев удар, поради што може да доведе и до заблуда.
Главните симптоми вклучуваат ненадејна, интензивна болка во градите и отежнато дишење. Според Британската фондација за срце, некои луѓе може да доживеат и други симптоми како срцебиење (палпитации) или мачнина.
Состојбата се дијагностицира ако медицинските испитувања исклучат срцев удар и проблеми што не се поврзани со срцето и ако левата комора на пациентот ја променила формата, поради што неговиот срцев мускул изгледа ослабен или не може правилно да пумпа крв.
Меѓутоа, лекарите од Мајо клиниката велат дека синдромот на скршено срце може да предизвика и смрт во ретки случаи. Еден познат пример е холивудската икона Деби Рејнолдс, која почина во 2016 година на 84-годишна возраст. Таа доживеа фатален мозочен удар само еден ден откако нејзината ќерка Кери Фишер почина од срцев удар. Пред да умре, Рејнолдс му рекла на својот син Тод Фишер дека сака да биде со Кери.
Во 2003 година беше објавено дека музичката легенда Џони Кеш починал од истиот синдром. Тој почина четири месеци откако неговата сопруга, Џун Картер, почина од компликации по операција на срце во мај 2003 година.
