Мутациите кои влијаат на тоа дали сакаме кафе или не, се идентификувани за прв пат. Утврдено е дека вкусот на кафе нема врска со тоа дали го сакаме или не, туку тоа го одредува чувството кое го имаме после пиењето кафе. Ова истражување би можело да објасни и зошто некои можат да испијат кафе и веднаш после тоа да заспијат, додека други не можат да спијат.
Првиот тест од овој вид со кој се тестирани геномите кои ги одредуваат преференциите кон горчливите и слатките напитоци покажал дека тие преференции всушност не зависат од вкусот, туку од начин на кој напитоците влијаат на мозокот.
Доктор Мерилин Корнелис и нејзините колеги мапирале ДНК од 336 000 луѓе, а на нивно изненадување, љубовта кон кафето, алкохолот или слатките напитоци не зависела од генот кој го одредува вкусот – туку биле врзани за „психоактивните“ својства на тие напитоци. Хемикалиите како кофеинот во кафето и некои други напитоци делуваат на централниот нервен систем, што влијае на функциите на мозокот – доведувајќи до привремени промени во перцепцијата, расположението, свеста и однесувањето.
„Генетиката одредува дали личноста сака кафе или не, но не врз основа на вкусот, туку врз основа на психоактивните компоненти на напитоците. Со други зборови, луѓето сакаат кафе или алкохол заради тоа како се чувствуваат после испивањето, а не заради вкусот“, објаснува доктор Корнелис.
Тоа објаснува зошто, да речеме, вие сакате кафе или вино, а вашиот пријател ужива во чај или некој енергетски напиток. Стручњаците велат дека овие сознанија можеби ќе можат да помогнат во иднина, во контролирањето на консумацијата на некои напитоци – засладените напитоци се поврзуваат со различни болести и здравствени проблеми. Исто така, алкохолот се поврзува со повеќе од 200 различни болести. Од друга страна, постојат се повеќе докази дека умереното консумирање кафе може да помогне во спречувањето на развој на деменција, срцеви и други болести.
