Во новата студија во која учествувале 1 012 испитаници на возраст од 18 до 77 години, од кои 54,5 отсто биле жени, а 45,5 мажи волонтерите одговарале на прашања за своите навики за спиење. Добиените резултати биле мошне интересни.
Најпрво, учесниците кои спијат на грб пријавиле дека освен што убаво спијат и наутро се будат мошне расположени и мотивирани за денот пред себе. Од друга страна, околу 40 отсто од испитаниците кои спиеле на страна или во фетус положба рекле дека спиеле лошо и дека често наутро се буделе нерасположени и без волја. Исто е и кај оние кои спијат на стомак, а кои пријавиле дека наутро не се будат особено одморени и свежи, во однос на оние кои спијат на грб.
Оваа студија ги опфатила и оние кои делат кревет со партнер
Судејќи според резултатите, меѓу паровите најлошо спијат оние партнери кои еден кон друг се завртени со грб – 37 отсто од нив рекле дека спијат лошо. Но не е се така црно затоа што двојките кои спијат во „лажица“ положба – кога едниот партнер ќе го гушне другиот од зад грб – партнерите спијат многу подобро, а 72 отсто од нив велат дека наутро се будат свежи и одморни.
Истражувањето покажало и дека постои врска меѓу квалитетот на сонот и првата работа на која помислуваме штом ќе се разбудиме. Она што не е ни малку изненадувачки е дека оние кои спијат лошо штом отворат очи помислуваат на тоа дека би поспале уште малку. Среќниците кои се будат одморни и наспани, наутро најчесто прво помислуваат на работа – 31 отсто од мажите и 23 отсто од жените. Кога станува збор за оние кои се будат мрзеливи и уморни, околу 44 отсто од мажите и 39 отсто од жените велат дека наутро пуштаат музика за да се разведрат. Освен тоа околу 43 отсто од мажите и 34 отсто од жените користат кафе за наутро да се расонат и разбудат. Некои од нив, пак вежбаат, некои го шетаат домашниот миленик, а некои зборуваат со саканата личност.
