Грејната сезона одамна почна, а неретко многумина од нас радијаторите ги користат и за сушење алишта. Но британските научници предупредуваат дека треба веднаш да престанете со оваа лоша навика бидејќи со сушењето алишта на загреана површина се зголемува нивото на влага во станот, а со самото тоа автоматски се создава и мувла, која, пак, може да резултира со напади од астма.
Главната причина за настанување на астма е чувствителноста на респираторните алергени, т.е супстанци од надворешната средина, како што се домашната прашина, поленот, тревата, дрвјата, мувлата, влакната од животни и димот од цигари. Со влагата, пак, се ослободува мувла која се проширува по куќата и која кога ќе ја вдишите може да предизвика сериозни алергиски реакции. Ваквите реакции се поизразени кај децата и постарите лица, како и оние со кожни болести и намален имунитет.
Како да ја препознаете мувлата?
Мувлата е лесно забележлива и може да биде во бела, црна, жолта, сина или зелена боја. Исто така, може да има мека, нерамна или рапава површина, а се карактеризира со силен и непријатен мирис. Се јавува во влажни услови, така што вообичаените места на кои се јавува мувлата се тапети, подови, прозорци, ѕидови…
