Додека си играат на подот, составуваат сложувалка или гледаат телевизија, децата често седат во положба на буквата W. Иако тоа може да изгледа слатко и невино, експертите предупредуваат дека може да му наштети на развојот на децата.
„Следниот пат кога детето ќе седне да си игра или да гледа телевизија, обратете внимание во каква положба седи. Ако седи во положба на W, со колената пред себе и нозете раширени од двете страни на телото, предложете му да ја промени положбата“, советува д-р Клаудија Чалонер од американската компанија „Movement Rx“, специјализирана за велнес и физикална терапија.
Д-р Чалонер предупредува дека позицијата W може да доведе до ортопедски проблеми со зглобовите.
„Ова не е лошо само за колковите, колената и глуждовите, туку го успорува и развојот на мускулите задолжени за држење на телото и основна стабилност, која е важна, особено кога како возрасни луѓе треба да подигнеме товар или сакаме да се занимаваме со каков било спорт“, објаснува докторката и додава дека на овој начин доаѓа и до каснење во развојот на грубата моторика, координација и рамнотежа.
Наместо да ги критикувате децата кога седат во оваа положба, д-р Чалонер препорачува да ги пофалите кога седат правилно.
