Иако правилниот избор на намирници, секако, нема еднакво добар ефект како и престанувањето со пушење, истражувањата покажале како некои намирници навистина помагаат да се исчисти телото од никотинот.
Зошто е важно чистењето од никотин?
Никотинот е стимуланс кој може да ги блокира нервните и мускулните клетки, така тие да не можат правилно да функционираат. Никотинот ја засилува работата на срцето, крвниот притисок, па на тој начин се зголемува и ризикот од мозочен удар.
Спанаќ и брокула
Зелениот зеленчук е одличен „лек“. Богат е со витамин Ц и витамини од Б групата, како и со фолна киселина. Овие витамини се нужни за здравјето на метаболизмот и претставуваат екстра порција на енергија. Витаминот Ц особено е важен бидејќи ги чува белите дробови од отрови. Брокулата, од друга страна, содржи ген НРФ2 кој ги штити белодробните клетки.
Брусница и ѓумбир
Овие две намирници се богати со антиоксиданти. Токму тоа му треба на телото, особено ако сте пушач. Како такви, брусницата и ѓумбирот се најдобри чистачи на телото и на крвта. Најдобро е овие намирници да се консумираат свежи, бидејќи тогаш и концентрацијата на нивните ефикасни соединенија се најсилни.
Лимон и портокал
Дали сте знаеле дека ако испушите една цигара, никотинот од неа во телото се задржува три дена и цело тоа време ги уништува клетките на кожата и на белите дробови?! Со цел што побрзо да се ослободите од никотинот, зајакнете го имунитетот и здравјето на кожата, белите дробови и крвните садови, посегајќи по лимон и портокал. Богати со витамин Ц, тие помагаат во борбата против несаканите последици од пушењето.
Морков
Ако сте редовен пушач, тогаш мора да знаете дека со секоја запалена цигара во телото се намалува нивото на витамините Ц и А. На тој начин доаѓа до оштетувањето на нервните клетки, ослабена циркулација и мозочни функции. Зајакнете го телото со редовен внес на морков и обезбедете му порција витамини А, Ц и К.
Калинка
Пушењето го зголемува бројот на отчукувања на срцето, го покачува крвниот притисок и го намалува нивото на кислород во крвта. Наведените симптоми би требало да се неутрализираат, а добар начин е почесто да консумирате калинка, која ќе ја подобри циркулацијата и ќе му помогне на телото во производството на црвени крвни зрнца.
