Декември е месец во кој најверојатно најчесто користиме алуминиумска фолија. Освен за печење многумина ја употребуваат и за чување на остатоците од храната во фрижидер. Иако речиси и да не постои семејство кое ова не го направило барем еднаш, стручњаците истакнуваат дека е мошне лоша и погрешна одлука.
Остатоците од храна можат да останат свежи во фрижидер и до четири дена, но само ако правилно се чуваат. Многумина тоа го прават така што ги оставаат остатоците во чинија, што потоа ја прекриваат со алуминиумска фолија, а која потоа ја ставаат во фрижидер до следното консумирање.
Сепак, колку и да изгледа едноставно и корисно, постапката треба да се избегнува. Некои бактерии како што е Bacillus cereus, остануваат на намирниците и после готвењето, а остатоците од храната кои остануваат на собната температура подолго од два часа се одлична подлога за бактериите кои брзо ќе се размножат, предупредува американскиот “Washington State Department of Health”.
Прекривањето со алуминиумска фолија остава доволно воздух за бактериите да се размножуваат на храната која ја оставате во фрижидерот, па заради тоа би требало да се одбегнува ваквиот начин на чување. Многу подобра опција е храната да се става во садови во кои нема да влегува воздух за намирниците да останат подолго свежи, предупредува Линзи Малоун, нутриционистка и диететичарка од болницата во Кливленд.
