Истражувачки тим во кој биле стручњаци од осум медицински установи од Кина и од САД, неодамна ги анализирале податоци на 85 пациенти кои починале поради откажување на повеќе органи, откако биле хоспитализирани поради тешка форма на КОВИД-19. Тие пациенти биле хоспитализирани помеѓу 9.јануари и 15.февруари оваа година, а се покажало дека имале неколку заеднички фактори, што авторите на студијата го објавиле во списанието American Journal of Respiratory and Critical Medical Care Medicine.
Научниците имале пристап до медицинските картони на починатите лица, и можеле да проверат и евентуални хронични болести и коморбидитети ако ги имале, а можеке да проверат и кои симптоми ги имале откако се заразиле со вирусот и да ги видат нивните лабораториски тестови и КТ снимки, како и податоците за терапиите кои ги примале додека престојувале во болница.
Тие откриле дека 72,9% од починатите биле од машки пол на просечна возраст од 65,8 години, и дека имале хронични болести – срцеви болести и дијабетес.
“Се надеваме дека оваа студија ќе ги предупреди оние кои досега се уште не ја сфатиле сериозноста на КОВИД-19 и како ризична група ќе ги истакнам мажите на возраст над 50 години со хронични коморбидитети, вклучувајќи хипертензија, кардиоваскуларни болести и дијабетес“, порачале авторите на студијата додавајќи дека помеѓу починатите пациенти чии податоци ги анализирале, најчести симптоми биле треска, отежнато дишење и замор.
Научниците исто така откриле дека 81,2% од починатите опфатени со оваа студија, имале многу ниско ниво на еозинофили (вид на бели крвни клетки кои имаат важна улога во борба против инфекции) во моментот кога биле хоспитализирани. Меѓу компликациите кои ги имале за време на престојот во болницата поради КОВИД-19, најчесто биле затајување на белите дробови, шок, акутен респираторен дистрес синдром, срцева аритмија или неправилен пулс.
НЕЕФИКАСНА ТЕРАПИЈА
Како дел од терапијата, повеќето примале антибиотици, антивирусни лекови, глукокортикоиди, а некои интравенски примале и имуноглобулини (познати и како антитела) или интерферон кој е исто така стимулатор на имунолошкиот одговор, но се чини дека лековите немале многу позитивни ефекти.
“Можеби наше најзначајно откритие е тоа дека, иако респираторните симптоми главно се јавиле дури околу една недела по почетокот на болеста, кога еднаш се појавиле, дошло до нагло влошување на состојбата, на што укажува и кусиот временски период од денот на хоспитализацијата со денот на смртта (во просек 6,35 дена)“, објавиле авторите на студијата.
Тие напоменуваат и дека абнормално ниското ниво на еозинофили, состојба која се нарекува еозинофилопенија, може да биде поврзана со зголемениот ризик за смртен исход кај лицата кои боледуваат од КОВИД-19.
Во одговор на инфекцијата, нагласуваат експертите, одредена улога може да има и генетиката, но треба да се има на у, и дека текот на пандемијата може да се промени како вирусот мутира.
