Истражувањата покажале дека омега-3 масните киселини кои потекнуваат од рибите имаат подобар ефект врз превенција на рак на дојката во однос на омега-3 масните киселини кои се наоѓаат во лененото масло и другите растителни масла.
Омега-3 масни киселини се од суштинско значење за здравјето на срцето, мозокот, очите и зглобовите. Во групата на омега-3 масни киселини спаѓаат алфа-линоленската (АЛА), докозахексаенската (ДХА) и еикозапентаенската (ЕПА) киселина. АЛА е најзастапена во семињата и растителните масла, додека ДХА и ЕПА се најзастапени во морските риби, алгите и фитопланктонот.
Научниците направиле истражување на глувци, каде ја испитувале ефикасноста на различни видови омега-3 масни киселини во превенција од рак на дојка. Обликот на карцином на дојка индуциран во истражувањето бил HER-2, агресивна форма која погодува 25 % од пациентите со рак на дојка и има слаба прогноза за лекување.
Со цел да се испита превентивниот ефект на различните видови омега-3 масни киселини, глувците пред индукацијата на карциномот биле изложени на специфични омега-3 масни киселини.
Резултатите покажале дека омега-3 масните киселини од морско потекло (DHA и EPA) може да ја намалат големината на карциномот за 60-70 % и бројот на метастази за 30 %. Од друга страна, омега-3 масните киселини од растително потекло (ALA) имале послаби резултати.
Омега-3 се бори против ракот со вклучување на гени поврзани со имунолошкиот систем и блокирање на патиштата за раст на туморот, Затоа научниците препорачуваат повисок внес на омега-3 масни киселини од морски намирници, најмалку две до три порции риба неделно. Идните истражувања ќе го разгледаат ефектот на омега-3 масните киселини врз другите форми на рак на дојка, пишува „The Journal of Nutritional Biochemistry“.
