Најновото истражување на Националниот институт за борба против ракот во САД покажува дека расте бројот на заболени од рак на анусот. Најчесто ги погодува помладите темнокожи мажи и жени на постара возраст, велат авторите на студијата.
„Стапките на раст на болеста брзо се зголемуваат, а за тоа придонела и традиционалната перцепција за карциномот на анусот како не толку често заболување. Затоа е недоволно истражен“, објаснува професорот Ашиш Дешмук.
Повеќето случаи на анален карцином се во врска со ХПВ инфекцијата. Според Центарот за истражување и превенција на болести во САД, дури 9 од 10 Американци заболени од канцер на анусот биле заразени од ХПВ.
„Луѓето мораат навреме да ги препознаат малигните заболувања, а тоа е случај и со ракот на анусот. ХПВ инфекцијата создава патогени промени на плчестите клетки на ткивото на ректумот“, објаснува доктор Џек Џејкоб.
Студијата која ја спровел доктор Дешмук покажува дека три четвртини од возрасните Американци не знаат дека се заразени со ХПВ. Станува збор за најраспространетата сексуално пренослива инфекција во САД.
Најдобра превенција е вакцината против овој вирус. Им се препорачува на сите кои стапуваат во сексуални односи затоа што се изложени на потенцијална зараза.
„Не постои вистински метод за превенција од рак на анусот, но вакцината против ХПВ би го намалила бројот на заболени“, објаснува онкологот Стејси Коен.
Лекарите советуваат одбегнување на ризични сексуални односи, но и воздржување од анален секс.
Симптоми
Ракот на анус најчесто е проследен со ректално крвавење, крвава столица, болка во пределот на анусот или притисок.
„Луѓето најчесто помислуваат дека крвта се должи на хемороиди или некоја друга причина. Доколку забележите симптоми, веднаш појдете на лекар“, објаснува доктор Коен.
Кога болеста ќе се открие навреме, процентот на лекување е мошне висок.
„Лекувањето на карциномот на анус кој настанува како последица на инфекцијата со ХПВ има висок процент на успешност. Вклучува хемиотерапија и зрачење. Доколку тоа не е доволно, неопходна е операција“, објаснува Коен.
