Сте вложиле поголема сума во квалитетни очила за сонце и можеби мислите дека сега сте мирни подолго време. Но, треба да ги замените со нови за да си го зачувате видот, покажало најновото истражување.
Бразилските научници од Универзитетот Сао Паоло откриле дека после две години користење на очилата за сонце стаклата ја губат првобитната заштита од УВ зраци и окото повеќе не е заштитено од сонце. За време на носењето очила, сончевите зраци постепено ги оштетуваат стаклата се додека заштитата од УВ зраците потполно не исчезне. Се смета и дека просечното траење на заштитата од сонце е две години. Затоа секоја година треба да ги замениме очилата за сонце или барем стаклата.
Носењето очила за сонце без УВ заштита е опасно како и воопшто да не ги носите. Тоа се случува затоа што зениците на окото под затемнетото стакло се шират и сончевите зраци лесно продираат во окото. Последиците кои УВ зраците можат да ги предизвикаат се алергиски соларен конјунктивитис, воспаление на рожницата, како и оштетување на жолтата дамка, која е одговорна за средишниот вид на окото.
Внимавајте на очите на децата
Сонцето, исто така, придонесува за развој на катаракта, па заради тоа носењето очила за сонце со УВА и УВБ заштита може да ја забави појавата на катаракта. Исто така, очила за сонце треба да носат и децата и постарите лица затоа што нивните очи се исклучително чувствителни на оштетувањата кои ги предизвикуваат УВ зраците.
Најдобар пример за негативно влијание на сончевите зраци на очите е забележан во Индија, која има најголем број на слепи лица токму заради изложувањето на очите на штетното влијание на УВ зрачењето без никаква заштита.
На децата, баш како и на возрасните, неопходна им е заштита од сонце, особено ако се земе предвид дека поминуваат многу повеќе време на отворено за разлика од возрасните. Ултравиолетовото зрачење предизвикува бројни проблеми со видот, па е потребно да се заштити не само окото, туку и чувствителната кожа околу окото.
