Исфрлањето на јаглехидратите од исхраната е нешто што би можело да биде лоша одлука, сметаат експертите откако спровеле истражување и заклучиле дека исфрлањето на јаглехидратите од исхраната може да има последица пократок животен век.
Заклучокот доаѓа од студијата во која биле опфатени 15 428 луѓе во САД, а чии резултати биле објавена во магазинот „Lancet Public Health“.
Здравата исхрана, сметаат експертите, мора да содржи јаглехидрати, но во умерени количини. За време на 25-годишното истражување, научниците евидентирале 6293 лица, кои починале од предвремена смрт, што било поврзано со прекумерната или премногу ниска консумација на јаглехидрати.
Оние кои консумирале малку јаглехидрати, а тоа подразбира помалку од 40 отсто калории од таа група на намирници, како и оние кои со јаглехидратите претерувале во својата исхрана со повеќе од 70 проценти од калориите, биле изложени на зголемен ризик од прерана смрт во споредба со оние кои консумирале јаглехидрати умерено (50-55 отсто)
Заклучокот од истражувањето е дека исфрлањето на јаглехидрати од исхраната може да го скрати животот за дури четири години.
Јаглехидратите (глициди или шеќери) претставуваат органски соединенија чијашто молекула е изградена од трите биогени елементи: јаглерод, водород и кислород. Тие се многу битна состојка на сите живи организми, можат да се сврзат со други органски материи и да градат комплекси (со белковините градат гликобелковини, со липидите градат гликолипиди и слично).
Во клетката, јаглехидратите се јавуваат како главен извор на енергија, а претставуваат и важен градбен материјал на клеточните структури и лесно можат да се складираат како резервни материи. Ги има во два вида: прости (основни органски соединенија), каде спаѓаат моносахаридите и сложени (производни јаглехидрати), од кои оние со мала молекулска маса се олигосахариди, а тие со голема – полисахариди.
Нуутриционистите им даваат предност на сложените јаглехидрати, кои ги има во зеленчукот, овошјето и житарките, додека едноставните (простите) јаглехидрати (шеќери) се наоѓаат во слатките и белото брашно.
