Јапонските научници утврдиле дека жените кои имаат обичај да спијат помалку од шест часа, спаѓаат во групата со зголемен ризик од рак на дојка. До овој заклучок дошле со анализа на податоците од повеќе од 20 000 жени кои се собирани во текот на 8 години.
Научниците пресметале дека жените кои во текот на ноќта спијат шест или помалку часа имаат за 62 проценти поголеми шанси за појава на рак на дојката отколку жените кои спијат барем седум часа. Од друга страна, учесничките во истражувањето кои спиеле по 9 часа имале за 28 проценти помал ризик од оваа болест.
Научниците сметаат дека мелатонинот, хормонот кој го лачи епифизата, во текот на ноќта игра клучна улога во превенцијата од карцином на дојка. Претходни студии, исто така, покажале дека ниските нивоа на мелатонин во крвта (причина е најчесто работата во текот на ноќта, во ноќни смени или спиење во осветлени простории) го зголемуваат ризикот од оваа болест.
