Воспалението на јајчници (oophoritis) е една од формите на воспалителните болести на карлицата. Инфекцијата се појавува со искачување на микроорганизмите од долните делови на женскиот полов систем и е една од важните причини за појава на неплодност, вонматерична бременост и хронична болка во карлицата. Воспалението на јајчници треба да се разликува од другите форми на болка во стомакот.
СИМПТОМИ
- Болка во стомакот;
- Болка во карлицата;
- Исцедок од матката;
- Болен вагинален полов однос;
- Зголемена телесна температура;
- Треска (студенило);
- Мачнина;
- Повраќање.
Инфекцијата се искачува откако бактериите го колонизираат грлото на матката и се шират на матката, јајцеводите и јајчниците. Бактериите Neisseria gonorrhoeae и Chlamydia trachomatis типично предизвикуваат воспалителна болест на карлицата. Овие причинители ретко се изолираат од ткивото на јајчниците, почесто поттикнуваат инфекција со други бактерии. Доколку воспалението на јајчниците не се лекува, околу јајцеводите и јајчниците може да се создаде ограничена гнојна маса која се нарекува тубооваријален апсцес.
Воспалението на јајчниците е најчеста кај жените до 25-годишна возраст. При лекарски преглед се дијагностицира:
- Телесна температура повисока од 38 степени Целзиусови;
- Чувствителност при палпација на долниот дел од стомакот;
- Гноен исцедок;
- Болна чувствителност на допир на грлото на матката;
- Болка во јајчниците;
- Маса во делот на јајчниците, доколку се појавил тубооваријален апцес.
