Ништо не вознемирува така како кога ќе забележите крв на гаќите, а не сте во период на менструален циклус. За жал, без посета на гинеколог не може да знаете дали циклусот само се пореметил или се случува нешто друго. Доколку забележите нерегуларно крварење, причина за тоа може да бидат некои од овие осум состојби или здравствени проблеми.
Трудни сте
Околу 20% од жените имаат лесно крварење за време на првите 12 недели од бременоста. Ако се јави нерегуларно крварење, а сте во репродуктивен период, лекарите секако сакаат да ја исклучат можноста дека на пат е бебе. Крварењето тогаш е послабо во споредба со вообичаената менструација.
Пиете лекови
Доколку пиете некои средства против згрутчување на крвта, може да се случи менструациите да бидат обилни и долги. И додатоците во исхраната, како гинко билоба може да ја разредат крвта и да влијаат на појавата на крварење. Таблети кои содржат естроген и прогестин го менуваат нивото на хормони ии може да бидат виновници за појава на крварење вон циклус. Ако скоро сте почнале да земате некој лек и сте ги забележале симптомите, мора да му кажете на лекарот.
Нешто се случува со штитната жлезда
Штитната жлезда може да има влијание на вагиналното крварење. Ако забележите дамки од крв, докторот сигурно ќе ве праша како ви функционира штитната жлезда. Неактивна штитна жлезда може да влијае на хипофизата која има низа влијанија на хормоните, а во некои случаи може да се појави и крварење.
Полова болест
Имате некоја полово пренослива болест, а можеби не знаете. Тие често се јавуваат без никакви симптоми. А ако забележите крварење, особено после секс, можеби станува збор за кламидија или гонореја. Трихомонијазата и ХПВ се состојби кои може да предизвикаат воспаление на цервиксот, а кога цервиксот е воспален, доаѓа до крварење.
Имате спирала
Спиралата, особено онаа со бакар, може да доведе до крварење кај околу 25% од жените. Жените велат дека тогаш циклусот е пообилен и подолго трае.
Груб сексуален однос
Крв може да се појави и од груб секс. Резултат од грубиот однос може да биде оштетување пред самиот отвор на вагината. Ако тоа не е премногу болно и ја знаете причината за крв на долната облека, само од себе ќе зарасне и не е потребно да посетите лекар
Синдром на полицистични јајчници
Полицистични јајчници значи дека имате вишок на андроген, машки хормон. Тоа може да биде причина за интерциклично крварење. Тестостеронот го попречува естрогенот да се однесува како што треба. Симптоми се – долг и тежок циклус, долг период меѓу циклусот и целосно прескокнување на циклусот.
Карцином
Ова е причина зошто крварењето меѓу циклусите треба сериозно да се сфати. Не е толку често, причина за крварење да биде карцином и тоа е најлошо можно сценарио. Крварењето може да се јави поради некоја предканцерогена состојба или карцином на утерусот или цервиксот. Карциномот е почест ако имате зголемен ризик, особено ХПВ.
