Лицата кои боледуваат од долг КОВИД-19 пријавуваат дека чувствуваат силен мирис на риба, сулфур и слаткаст мирис, пишува Скај њуз. Невообичаен несакан ефект, познат како паросмија (изменетост или пореметеност на осетот за мирис), може несразмерно да влијае на младите и на здравствените работници.
Оториноларинголот д-р Нирмал Кумар кој е меѓу првите ја идентификува аносмијата, односно губењето на сетилото за мирис, како симптом на новиот коронавирус, вели дека се работи за “многу чуден и единствен симптом“.
Д-р Кумар забележал дека меѓу илјадниците пациенти кои се лекуваат од долготрајна аносмија во Велика Британија, некои имаат паросомија.
Тој вели дека пациентите чувствуваат дека осетот за мирис им е изобличен, што многу ги вознемирува пациентите и влијае на нивниот квалитет на живот.
Долгиот КОВИД-19 е поим кој ги опишува симптомите на коронавирусот кои може да продолжат со недели или со месеци по болеста.
Опишувајќи го како “невротропен вирус“, проф. Кумар вели дека КОВИД-19 има афинитет кон нервите во главата, особено кон нервите одговорни за мирис.
“Тоа веројатно влијае и на останатите нерви, и на, како што сметаме, невротрансмитерите кои испраќаат пораки во мозокот. Луѓето пријавуваат проблеми со спиењето, халуцинации и промени по прашање на слухот“, објаснува оториноларингологот и додава дека се пронаоѓаат начини како да им се помогне на пациентите да се опорават.
Даниел Савески, 24-годишен банкар кој живее во Лондон, вели дека го изгубил осетот за вкус и мирис, откако во март добил коронавирус и од тогаш страда од паросмија. Вели дека работите кои имаат силен мирис, како канта за ѓубре, му мирисаат на сулфур или на изгорен тост.
“Тоа ми го намали уживањето во храната и помалку ме депримира тоа што не можев да го осетам мирисот на одредена храна“, вели Савески.
Лин Корбет, администратор која работи во агенција за продажба на недвижности, вели дека била “шокирана“ кога се разбудила на својот 52. Роденден во март и останала без мирис и вкус.
“Од март, па се до крајот на мај не можев ништо да вкусам. Искрено мислам дека можев да загризам и свеж кромид и ништо да не осетам“, вели таа.
Мирисот почнал да и се враќа во јуни, но ништо не и мирисало како што треба.
“Повеќето работи одвратно мирисаа, тој болно сладок мирис е тешко да се опише, оти никогаш претходно не сум го почувствувала“, додава таа.
Вели дека и покрај тоа што претходно била “зависник од кафе“, тој пијалак сега и мириса на пиво и на бензин. Иако не е сигурна дали некогаш ќе и се врати мирисот, Корбет вели дека тоа е во ред, особено што поминала без болници, тешки симптоми и што е жива.
Британското ринолошко здружение, им препорачува на сите кои имаат паросмија да се подложат на “тренинг на мирис“ кој вклучува мирисање на масло од ружа, лимон, каранфилче и еукалиптус, секој ден околу 20 секунди да се поврати осетот за мирис.
Проф. Кумар вели дека постојат ветувачки извештаи дека таквиот тренинг им помага на пациентите и дека поголемиот број на пациенти со тек на време повторно имаат нормален осет за мирис.
