Несоницата или медицински наречено инсомнијата е нарушување кое кај лицето се манифестира со течкотии при заспивање или одржување на сонот. Ваквата состојба влијае на целокупното здравје и го нарушува квалитетот на секојдневното функционирање кај лицето кое пати од ова нарушување. Несоницата може да се појави на која било возраст, но почеста е кај возрасни жени отколку возрасни мажи. Постојат состојби на инсомнија и кај децата.
Причините, како и симптомите и сериозноста на ова нарушување се различни од пациент до пациент. Но, според медицинската пракса, за најчести причини за појава на инсомнија се сметаат стресот и анксиозноста. Навиките како работа во смени, консумирање алкохол и кофеински напитоци, пушење и обилно јадење, исто така, се вбројуваат во првите ризик фактори за оваа стостојба. Проблемите со здравјето на срцето, хроничната болка, уринарните инфекции и проблемите со тироидната жлезда се можни причинители за појавата на несоница. Влијание на сонот имаат и некои лекови.
Несоницата е најчеста причина што води до дневна поспаност, летаргија и општо чувство на немоќ и може да предизвика проблеми како што се замор, недостаток на енергија, потешкотии за концентрирање и задржување на вниманието, како и иритабилност.
Ефектите од несоницата може да влијаат на речиси секој аспект од вашиот живот. Истражувањата покажуваат дека несоницата е поврзана со значителни нарушувања на квалитетот на животот. Студиите базирани на младата популација покажуваат висок степен на психијатриски коморбидитет кај пациенти со хронична несоница.
Постојат два вида на инсомнија:
Акутна инсомнија – или наречена краткотрајна несоница. Симптомите при оваа состојба се присутни кај лицето не повеќе од еден месец.
Хронична несоница – овој тип трае со месеци, а понекогаш и со години. Повеќето случаи на хронична несоница се од секундарно ниво, односно тие произлегуваат од друг примарен проблем.
Најчести групи на луѓе погодени од ова нарушување се жени во менопауза, постари лица, адолесценти или млади возрасни ученици и, секако, луѓе кои често патуваат (особено преку повеќе временски зони) или работат во смени. Пореметувањето во спиењето ги намалува работните перформанси и може да придонесе за зголемување на телесната тежина, зголемена анксиозност, депресија, раздразливост, проблеми со концентрирање како и проблеми со меморија и намален имунитет.
