М
аста од невен е еден од најдобрите пријатели на вашата кожа. Огромен број дерматолошки проблеми можат да се ублажат, па дури и да се надминат со помош на лековитите својства на ова цвеќе со прекрасна жолто-портокалова боја. Calendula officinalis или невен, секогаш бил дел од градините на нашите баби, кои ги знаеле неговите лековити својства.
Жолтата боја на цветот содржи каротеноиди кои во телото се метаболизираат во витамин А, што го објаснува корисниот ефект на невенот врз кожата. Невенот содржи етерични масла, танини, шеќери, ликопен, протеини, пигменти каротеноиди, календулин, минерали и друго. Има анти-воспалителни својства, а ефикасен е и со бактериски, габични и вирусни инфекции. Денес, освен во медицински цели, може да се користи и за исхрана и како природна боја во индустријата за храна и козметика. Од цвеќето може да се прави маст, мацерати, облози или чај.
Маста од невен се користи за лекување на хронични рани, гребнатини на кожата, сува кожа, псоријаза, каснувања од инсекти, смрзнатини, чиреви, брадавици и акни, а кремите со невен имаат подмладувачки ефект.
Маслото од невен помага за регенерација на кожата и е одлична прва помош за намалување на последиците од изгореници. Иако дерматолозите советуваат да се избегнува долготрајното изложување на сонце во летните месеци, сепак, и да дојде до појава на изгореници, невенот ефикасно го ублажува воспалението на кожата и го поттикнува лекувањето и регенерацијата на кожата.
