Британката Шерон Вилијамсон (50) од Солихул била мошне близу до смртта. Срцето престанало да и чука, а лекарите и рекле дека нема да живее подолго од 12 дена ако не добие ново срце. Четири дена подоцна и се јавиле да и кажат дека имаат орган за неа, наводно од војник кој починал како резултат на повреди добиени во Ирак, а завршил во истата болница во која била и таа.
Зафатот поминал во најдобар ред и Шерон полека почнала да се опоравува, но со враќањето на силата почнала да забележува чудни промени кај себе. И се појавила силна желба за пиво. Шерон верува дека тоа се должи на навиките на мажот чие срце го добила.
„Се што кажував после операцијата е дека сакам пиво. Очајнички го посакував. Кога ми дозволија да се напијам, една лименка испив на екс“, раскажала Шерон.
Дека нешто не е во ред со нејзиното срце забележала после тренинг.
„Тој ден истрчав околу 16 км и само што се вратив до својот автомобил кога почнав да се чувствувам лошо. Нозете ми се тресеа, почнав да повраќам. Отидов во болница. Иако претходно одев шест пати на прегледи сите ми велеа дека сум здрава и во добра форма, и да не се грижам“, раскажала Шерон за „Дејли меил“.
Едно утро откако повторно завршила во болница лекарите и рекле дека срцето и е во лоша состојба и дека прогнозите не се добри ако не добие ново. И бил дијагностициран гигантски миокардитис, пореметување кое предизвикува воспаление на срцевиот мускул. Добила терапија и дури два пати била оперирана, но, за жал, без многу успех. Шерон открила дека се сомнева оти носи срце на војник затоа што такви муабети слушнала додека лежела во болницата.
Детали за тоа чии органи се донираат не може да се открија заради строгите насоки на британското здружение за трансплантација British Transplant Society. Пациентот може само да ја знае возраста на донарот, полот, како умрел и дали постои ризик од инфекции или малигни болести.
„Не ми кажаа многу за него, освен дека бил стар 38 години и имал две деца. Излегов со мојата приказна во јавноста за да ги поттикнам луѓето на донирање органи. Да не беше срцето на тој човек немаше да добијам прилика да гледам како расте мојата ќерка и како тргнува на факултет“, рекла.
