Интернет пријателите имаат улога на мелем во периодот кога човек преживува стрес. Меѓутоа ако луѓето под стрес не побараат поддршка во реалниот живот, тогаш се зголемува опасноста од патолошка зависност од друштвените мрежи – до овој заклучок дошол тим на научници од Центарот за психичко здравје во германскиот град Бохум.
Истражувањето опфатило 309 корисници на Фејсбук на возраст од 18 до 59 години. Студијата покажала дека постои сериозна врска меѓу секојдневниот стрес и трендот на создавање патолошка зависност од Фејсбук.
Истовремено оваа зависност се намалува доколку личноста која е под стрес има поддршка од семејството и пријателите во вистинскиот живот. Личностите кои немаат таква поддршка се во најголема опасност од зависности од социјалните мрежи.
Првите знаци на зависност се премногу поминато време на Фејсбук и чувство на грижа кога немате интернет. Ваквото патолошко однесување влијае и на друштвениот живот далеку од интернетот и може да ве воведе во маѓепсан круг.
