КОВИД-19 може да доведе до широк спектар на невролошки компликации, вклучувајќи мозочен удар, епилептични напади, пореметувања на движењето, воспалителни болести и други компликации, дури и кај пациентите кои имале умерен тек на болеста, покажува ново истражување.
Авторите на студијата, објавена на Neurology Clinical Practice, интернет издание на списанието на Американската академија за неврологија, прегледале пациенти со невролошки симптпоми и КОВИД-19 од многу болници и пронашле широк спектар на невролошки компликации.
“Станува збор за воспалителни компликации, мозочни удари и останати васкуларни состојби, метаболички проблеми, влошување на основните невролошки состојби и уште многу нешта“ набројува авторката на студијата, Приа Ананд од Медицинскиот факултет при Универзитетот во Бостон.
Сепак, на повеќето од тие лица не им била потребна критична нега, што сугерира дека невролошките компликации можеби се почести кај лица со умерена форма на КОВИД-19, како и кај оние со сериозен тек на болеста.
Во истражувањето учествувале 74 лица кои биле позитивни на КОВИД-19, на просечна возраст од 60 години и 47 од нив имале невролошки болести во минатото.
Додека биле хоспитализирани, 18 од пациентите имале мозочен удар, 15 од нив имале напади, а кај 26 се забележани дисфункции на мозокот кои предизвикуваат збунетост и делириум. Седум пациенти имале пореметување на движењето, дел од нив со изненадно мускулно вибрирање и откажување. Тројца се соочиле со трауматични повреди на мозокот.
Во болниците, од вкупната бројка починале 10 лица. Само 27 лица можеле да се вратат дома со или без домашна здравствена нега, а девет пациенти биле испратени на рехабилитација.
“Потребни се повеќе истражувања за да во целост се сфати ширината на невролошките компликации, повразни со инфекцијата со КОВИД-19“, вели проф. Ананд, додавајќи дека точно треба да се проценат ризик факторите за појава на ваков тип компликации.
