Како што старееме, така се повеќе му се „лутиме“ на огледалото, кое дава реален приказ на нашите бели влакна, подвиснати делови од телото и брчки на лицето.
Сепак, оваа слика може да се подобри бидејќи невролозите најпосле открија многу пријатна активност која може да помогне во одложување на стареењето, пишува „Curious Magazine“.
Според студијата објавена во списанието „Frontiers in Human Neuroscience“, физички активните луѓе можат да го забават процесот на стареење на нивниот мозок. Според научниците, најефикасен начин да се постигне тоа е танцот
Зошто танц?
Според д-р Катрин Рефилд, водач на студијата, физичката активност има ефект да го забави, па дури и да го спречи влошувањето на менталните и физички способности што доаѓа со возраста.
Во истражувањето се докажа дека двете физички активности, танц и вежби за издржливост, го зголемуваат делот од мозокот кој е најсклон кон пропаѓање. Но танцувањето само по себе се покажало како особено корисно кога станува збор за одржување или дури и подобрување на рамнотежата.
Истражувачите избрале 52 волонтери на возраст од 63 до 80 години и ги поделиле на две групи – една група била вклучена во работилница за танц, а втората била во спортска контролна група.
Танчaрската група тргнала на курс за танцување со постојани промени на кореографијата што учесниците морале да ги запомнат. Од друга страна, програмата на спортската група вклучувала вежби за сила, издржливост и флексибилност.
Кај двете групи било забележано зголемување на хипокампусот, област на мозокот која е најсклона кон пропаѓање поради стареењето. Тој дел од мозокот, исто така, е задолжен и за меморија, рамнотежа и учење. Но само кај волонтерите во танцовата група се зголемиле и делот од левата страна на хипокампусот и посебниот дел од десната страна наречен субикулум.
Студијата докажала дека танцувањето, особено кога е проследено со промени во кореографијата, е подобра активност од некои повторувачки активности како што се возење велосипед или пешачење.
Докторката Рефилд понатаму објаснува дека на волонтерите во танцовата група им пуштале различни жанрови на музика, а танцовата рутина ја менувале на секои две недели и изведувале разни движења со раце, чекори, ритам и брзини.
„Верувам дека сите во животот сакаат да бидат независни и здрави колку што е можно подолго. Физичката активност е еден од начините да се постигне ова, бидејќи намалува повеќе ризик фактори одеднаш. Мислам дека танцот е многу моќна алатка која му овозможува на телото и духот да останат помлади“, вели д-р Рефилд.
