Сте се запрашале ли некогаш дали е штетно по вашето здравје „стискањето“ односно одложувањето на одење во тоалет кога ќе почувствувате потреба за мокрење?
Мочниот меур на возрасните може да задржи околу половина литар урина пред да се појави нагон за празнење. Ако го одложувате одењето во тоалетот, мускулите на мочниот меур цврсто ќе затегнуваат за да ја задржат урината. Тоа нема да предизвика голема штета ако го правите повремено, но може да настанат здравствени проблеми доколку ваквото однесување ви прејде во навика.
Воспалението на мочниот меур може да влијае на двата пола, но жените се посклони кон овој здравствен проблем
Со постојаното одложување на празнење на мочниот меур во моменти кога за тоа ќе почувствувате нагон, може да предизвикате слабеење на мускулите на мочниот меур, развој на уринарна ретенција (неспособност за празнење на мочниот меур во целост) и развој на бактериска инфекција.
Воспалението на мочниот меур е најчесто предизвикано од бактеријата Ешерихија Коли и други ентеробактерии. Ова воспаление на мочниот меур, познато и како инфекција на долниот уринарен тракт може да влијае на двата пола, но жените се посклони кон овој здравствен проблем.
Кај жените, уретрата се наоѓа поблиску до анусот, што значи дека бактериите треба да патуваат пократко време за да стасаат до мочниот меур. Затоа е многу битно после секое вршење нужда да се бришете од напред кон назад, а не од анусот кон вагината за да се спречи инфекција. Немојте и пречесто да ја задржувате урината, бидејќи на тој начин е полесно да се развие воспаление, кое потоа е потешко да се излекува.
Поради пречестото задржување на урината, може да дојде до инконтиненција, а задржувањето на урината е поврзано и со формирање на бубрежни каменчиња.
