Доколку во текот на ноќта сакате да шетате низ дома, тогаш сте ноќна птица, а со тоа може да бидете склони кон развој на дијабетес и срцеви заболувања. Причината може да биде тоа што вашето тело не ги користи мастите за енергија во тоа време, сe наведува во новата студија објавена во списанието Experimental Physiology.
Кој рано се буди, неговото тело ќе се потпира на мастите како извор на енергија и често е поактивен во текот на денот, стои во истражувањето. Лицата кои остануваат будни долго време можеби нема да потрошат толку многу енергија, што значи дека мастите ќе се акумулираат на нивните тела и ќе го зголемат ризикот од дијабетес и срцеви заболувања.
“Ова би можело да им помогне на експертите да размислуваат за уште еден фактор во однесувањето кој може да придонесе за ризик“, вели д-р Стивен Малин, еден од авторите на студијата.
“Ноќните птици на тој начин имаат поголем ризик од дебелина и дијабетес тип 2, како и кардиоваскуларни болести во споредба со оние кои рано стануваат“, објаснува тој.
Д-р Малин и неговите колеги поделиле 51 испитаник со прекумерна телесна тежина на ранобудници и оние кои остануваат будни до доцна. Истражувачите ги следеле учесниците и нивните навики во текот на една седмица кога се работи за активност и ги проверувале нивните тела кога се активни и кога изведуваат вежби со умерена активност на лента за трчање.
Лицата кои стануваат рано се почувствителни на инсулин и согоруваат повеќе маснотии кога телото е во мирување или за време на вежбање. Од друга страна, ноќните птици се помалку чувствителни на инсулин и користат повеќе јаглехидрати наместо масти за енергија. Не е јасно зошто метаболизмот се разликува кај овие групи, но еден аспект може да биде неусогласеноста помеѓу природниот циклус на телото и времето кога лицето си легнува и кога се буди.
На пример, ноќните птици можеби претпочитаат да одат доцна во кревет, но и да се будат рано поради работа или грижа за децата. Резултатите би можеле да имаат влијание врз циклусот на спиење и будење и би можеле да откријат ризик по здравјето на луѓето кои работат во ноќна смена.
МОЖЕТЕ ЛИ ДА ГИ ПРОМЕНИТЕ ВАШИТЕ НАВИКИ НА СПИЕЊЕ?
Според едно истражување на гените кои влијаат на внатрешниот часовник, можеме да имаме малку контрола кога се во прашање навиките за спиење, но никако не е едноставно. Авторите на таа студија наведуваат дека е тешко да се промениме и да ги менуваме навиките, а потребно еи многу трпение да се усвојат нови. Ако сепак сакате да влијаете на промените, почнете постепено. Исто така, добро е да знаете дека вашите навики за спиење може да се променат со годините, па ако денес сте ноќна птица, можете да очекувате да станете утринска подоцна во животот.
