Ширум светот милиони лица работат ноќе за што нема многу официјални податоци, но според една студија на Унивезитетот Принстон, помеѓу 7 и 15 % од работната сила во индустриските земји е вклучена во некој вид на ноќна работа, и покрај доказите за нејзиното штетно влијание врз здравјето.
„Клучниот проблем е нашиот внатрешен биолошки часовник кој е наместен на надворешниот свет, односно на изложувањето на циклусите на светлина и на темнина“, вели Расел Фостер, стручњак за проблеми со спиењето и професор на Универзитетот Оксфорд.
Тој го објаснува механизмот на делување на биолошкиот часовник кај луѓето и вели дека неговото занемарување го активира стресниот механизам. Стресот го зголемува нивото на шеќер во крвта и крвниот притисок бидејќи организмот се подготвува да одговори на потенцијалната закана „која всушност не постои“ – ние само сме на работното место, истакнува Фостер.
Зголеменото ниво на стрес може да доведе и до кардиоваскуларни болести или метаболички абнормалности како дијабетес тип 2. Стресот ја отежнува и работата на имуниот систем што е добра подлога за повисок степен на рак на дебелото цреви и рак на дојка.
Светската здравствена организација ја класифицира ноќната работа како можен причинител за појава на карцином.
Тоа се долгорочни последици, но недостатокот на сон предизвикува и акутни состојби. Највидливи се заморот, поради што информациите не ги примаме на вистинскиот начин, социјалните сигнали погрешно ги интерпретираме и се губи можноста за емпатија.
А дополнително, како што знае секоја личност која работела ноќна смена, по неа не е лесно да се одолее на нездравата храна. Постојат истражувања кои потврдиле дека консумирањето на јаглехидрати се зголемува за 35 до 40 % по само четири до пет дена намалени часови на ноќен сон поради зголеменото ниво на хормонот грелин кој ја регулира гладта. Тој го поттикнува апетитот и желбата за шеќери и јаглехидрати. Освен чести здравствени прегледи, работниците кои работат ноќе поради ризикот од кардиоваскуларни болести и метаболички пореметувања, би требало да дофат на рака да имаат здрава храна, пред се овошје.
