Ноќното мокрење е неконтролирано ослободување на урината во текот на ноќта, при што не постои некоја органска болест која е предизвикувач. Мокрењето може да го предизвикаат разни психосоцијални проблеми како што се проблеми во друштвото, задевање од браќата и сестрите и недостаток на самодоверба.
Некои родители се обидуваат да го спречат детето да мочка во креветот со тоа што ќе му го ограничат внесот на течности во вечерните часови. Иако ова делува како разумно решение, експертите велат дека нема никаков ефект. Причина за тоа е што детето нема да престане да мочка во кревет се додека не почне да се буди кога ќе почувствува потреба за мокрење.
Се разбира, ниедно дете нема намерно да се измочка во креветот
Многу родители ги загрижува и тоа што децата до одредена возраст не можат да ја контролираат потребата за уринирање, но овој рефлекс кај некои деца се развива подоцна.
Дел од експертите сметаат дека родителите не треба да го носат детето ноќе во тоалет доколку не е целосно разбудено, бидејќи на тој начин може да се постигне спротивното од посакуваниот ефект.
Доколку детето не мокри во креветот, но во еден момент почне да го прави тоа, причина може да биде одредена ситуација која е стресна за детето, како што се промените во градинка, ново бебе во семејството, развод …
Експертите нагласуваат дека проблемот ќе исчезне кога рефлексот целосно ќе се развие, но ако тоа не се случи до петтата година, доколку детето и на таа возраст мокри во кревет еднаш или двапати неделно, потребно е да се јавите на доктор.
Треба да се има на ум дека особено машките деца честопати не се невролошки спремни да го контролираат мочниот меур и дебелото црево, дури и во горенаведената возраст. Детето можеби едноставно созрева подоцна кога е во прашање вршењето нужда, бидејќи факт е дека децата се развиваат и созреваат со различна брзина.
Како и да е, овој проблем не треба да се запоставува бидејќи може да влијае на многу области од животот на детето.
Докторите потсетуваат дека упорноста на семејството е најбитен фактор во лекувањето на ноќното мокрење, и дека на детето освен медицинска му треба и психолошка поддршка. Тие се категорични дека казнувањето од страна на родителите никако не доаѓа предвид зашто може да остави сериозни и долгорочни психосоцијални последици кај детето.
