Една од причините поради кои ракот на јајчници ретко се открива додека не дојде до трета или четврта фаза е големината на абдоминалното подрачје и карлицата.
Научници од два универзитети во Австралија развиле нов крвен тест за откривање на рак на јајчници во рана фаза со што би се обезбедил позитивен исход за пацинетите со оваа болест. Имено, оваа болест во најголем број случаи се дијагностицира во веќе поодмината фаза кога метастазирала и на други органи.
Според Американското здружение за карцином, само 20% од ракот на јајчници се открива во рана фаза, а ако се открие навреме во 94% од случаите имаат добра прогноза. Новиот тест преку крв лесно може да го открие ракот во рана фаза со што би се олеснило лекувањето и би се обезбедил позитивен исход за многу жени. Овој тест во 90% од случаите карциномот го открива во рана фаза и со стопроцентна сигурност во подоцна фаза.
Денеска на располагање се две дијагностички методи: преглед на матката со трансвагинален ултразвук и крвен тест за рак на антигени (СА-125). Меѓутоа и двете методи имаат некои ограничувања. Првата покажува потенцијални тумори во матката, јајцеводите и јајчниците, но не открива дали се канцерогени. Од друга страна нивото на СА-125 може да биде зголемено и при состојби како што се бременост, циста, воспалителна болест на карлицата, хепатитис, цироза и друго.
