Лекот Достарлимаб е имунотераписки третман кој се користи во лекување на рак на ендометриум, но ова било прво клиничко истражување за тоа дали е ефикасен и против рак на ректумот. осегашните резултати укажуваат на тоа дека е изненадувачки ефикасен, а научниците наведуваат дека до сега не е забележано вака успешно клиничко тестирање, каде на секој пациент му се повлекол ракот.
Достарлимаб е лек со лабораториски произведени молекули кои делуваат како заменски антитела во човечкото тело. Сите 12 учесници во студијата се сметааат дека се во ремисија, една година по испитување на лекот.
Д-р Луиз А. Дијаз Јуниор од Memorial Sloan Kettering Cancer Center во Њујорк вели дека “ова е прв пат тоа да се случи во историјата на ракот“. Тој заедно со тим на истражувачи трудот со нивните наоди ги објавиле во стручното списание The New England Journal of Medicine.
Овие наоди во моментов го брануваат медицинскиот свет, а д-р Ален П. Венок вели дека целосна ремисија кај секој одделен пациент е “неучено“.
Д-р Венок е специјалист за колоректален карцином на Универзитетот во Калифорнија и не бил вклучен во студијата, но го поздрави ова истражување како прво во светот.
“Имаше многу солзи радосници“, вели онкологот д-р Андреа Серчек, коавтор на трудот опишувајќи го моментот кога пациентите дознале дека немаат рак.
Треба да се напомене дека се работи за мала студија во почетна фаза. Позитивните резултати досега се регистрирани кај 12 пациенти (толку досега учествувале во истражувањето), бидејќи истражувањето е се уште во тек. Сите пациенти имале тумори со генетски мутации ММРд, кои се наоѓаат кај 5-10 проценти од пациентите со рак на ректум.
Болните со такви тумори вообичено помалку реагираат на хемотерапија и зрачење, поради што обично е потребно и хируршки да се отстрани туморот. “Стандардниот третман на рак на ректумот со хируршки зафат и хемотерапија може да биде особено тежок за луѓето поради локацијата на туморот. Може да страдаат од дисфункција на цревата и мочниот меур, инконтиненција, неплодност, сексуална дисфункција и уште многу нешта“, вели онкологот Серчек.
Пациентите кои биле вклучено во оваа студија досега не ги поминале овие инвазивни постапки на лекување. Во текот на испитувањето добивале Достарлимаб секои три недели во тек на шест месеци, со можност за хемотерапија и операција ако туморите се вратат. Но, тоа не се случило.
Новиот лек кој се тестира на колоректален карцином ги оставил лекарите вчудоневидени откако покажал стопроцентна успешност во клиничкото испитување.
По шест месеци, сите 12 пациенти повеќе немале тумори кои би можеле да се видат по пат на МРИ, ПЕТ скен, ендоскопија и биопсија.
“Докторката Серчек ми рече дека ги прегледале сите мои тестови и со оглед дека нема знаци на рак, нема потреба да одам на хемотерапија“, вели Саша Рот, првиот пациент вклучен во истражувањето.
Студијата се уште не е готова и се работи за прелиминарни резултати. Три четвртини од 12 пациенти досега имале благи или умерени нуспојави од земање на лекот; вклучувајќи осип, чешање, замор и мачнина, но на ниту еден од нив не им се вратил ракот. Просекот на следење на пациентите е околу една година, а некои како Рут, се во ремисија веќе две години.
Испитувањето финално треба да вклучува околу 30 пациенти. Кога ќе биде готово, ќе се има целосна слика за тоа колку Достарлимаб е безбеден и ефикасен кај пациентите со рак на ректум.
