Општо е познато колку се штетни цигарите во бременоста, а докажано е дека не е важно дали трудницата пуши активно, односно дека е доволно да консумира цигари идниот татко, за да дојде до компликации. За да се намали бројот на предвремено родени бебиња, како и мртвородени, сите трудници ќе поминуваат тест на јаглен моноксид. Без оглед на тоа што со години наназад ова прашање се смета како нарушување на приватноста на трудниците, сега секоја ќе мора да одговори на тоа дали консумира цигари, како и тоа дали сопругот и е пушач. Имено, медицината повторно отишла чекор понатаму. Постои тест кој секоја жена во 12. недела од бременоста ќе мора да го направи, а станува збор за тестирање на присуството на јаглен моноксид во крвта.
Познато е дека пушењето во бременоста доведува до многу компликации – предвремено родени бебиња, деца родени со различни срцеви мани, но и мртвородени бебиња. Планот е бројот на овие трагични настани до 2025 година да се преполови. Со ова тестирање ќе се почне следниот месец во Велика Британија, а планот е до крајот на годината да биде проширено и на останатите земји во Европа. На пушачите ќе им биде понудено да престанат со оваа лоша навика и здравството ќе им овозможи помош од стручњаци за побрзо да се одвикнат.
„Прекинувањето на бременоста заради компликации е трауматично, а за раѓањето на мртви бебиња не би требало ни да се зборува. За овој ризик да се сведе на минимум, решивме да спроведеме низа мерки кои можеби не се популарни, но обезбедуваат раѓање здрави деца и создавање здрави семејства“, се наведува во соопштението на британскиот Национален здравствен центар.
Трудниците кои консумираат цигари ризикот од раѓање мртви бебиња го зголемуваат за 52 отсто, дури и ако пушат до 10 цигари на ден.
„Стратегијата на заштита на животите на бебињата е сигурен чекор кон избегнување на најголемата жалост со која можат да се соочат родителите“, изјавила Клеа Хармер, директор на Здружението за помош на родителите на мртвородени и родителите на бебиња умрени во неонаталниот период. Таа додава дека еден од начините е дефинитивно едукацијата на трудниците за штетноста на димот од цигарите, по плодот и нивно надгледување, како и тестирање на јаглен моноксид. Се смета дека трудниците кои ќе добијат поддршка мошне добро ќе реагираат на новите мерки.
