Милиони луѓе во светот користат статини, лекови со кои намалува нивото на холестерол во крвта и спречуваат ризик од развој на болести на срцето. Нова американска студија покажала дека токму статините, “лековите против маснотии“ ја намалуваат и смртноста од КОВИД-19, пренесува порталот Medical News Today.
Покрај својата основна намена, статините имаат и силен антивоспалителен, антикоагулантен и антивирален ефект, а сето тоа може да придонесе за намалување на компликациите поврзани со тешка клиничка слика на КОВИД-19.
Затоа и не изненадува што групата американски научници, меѓу кои имало и кардиолози кои се грижеле за заболените од КОВИД-19, истражила каков е ефектот на статините на оваа болест.
Тие го спродиле исходот од лекувањето на 1296 пациенти кои биле хоспитализирани поради коронавирусот. Половина од нив редовно користеле статини пред заразата, а половина не. Било утврдено дека употребата на статини помеѓу испитаниците на намалила смртноста за 50 проценти, еден месец од хоспитализацијата.
Ова е најголема студија од ваков вид досега спроведена, но не е единствената. Студија спроведена минатата година во Сингапур покажа дека луѓето кои користат статини имаат помала веројатност да завршат на одделот за интензивна нега поради КОВИД-19, отколку оние кои не ги земаат како вообичаена терапија.
Во американската студија е утврдено и дека пациентите кои користат статини побрзо се опоравуваат од коронавирусот.
Научниците сметаат дека ова може да биде затоа што статините, покрај тоа што го намалуваат воспалението и ризикот од згрутчувања, го отстрануваат холестеролот од надворешните обвивки на клетките. Рецепторите на кои се врзува SARS-CoV-2, вирусот што предизвикува КОВИД-19, се наоѓаат токму во делот на клеточната мембрана каде се таложи холестеролот. Без него, вирусот не може да навлезе во клетката, покажале резултатите од студијата.
„Доколку клиничките истражувања ги потврдат резултатите, статините може да се покажат како ефтина и ефикасна терапевтска стратегија во борбата против коронавирусот“, вели главниот автор на студијата, д-р Махеш В. Мадхаван, кардиолог во Медицинскиот центар Ирвинг при Универзитетот Колумбија.
