Студија која опфатила над 3000 млади американски војници покажала дека оние кои никогаш не прележале КОВИД-19, имаат пет пати поголем ризик од инфекција во однос на оние кои ја поминале болеста, се вели во научниот труд објавен во списанието Lancet Respiratory Medicine journal.
Според ова истражување, околу десет проценти од војниците кои се опоравиле од коронавирусот, повторно се заразиле.
“Ако сте прележале КОВИД-19, тоа не гарантира дека сте имуни, вакцинирањето останува пресудно“, порачува стручното списаните Лансет.
“Меѓу 189 серопозитивни испитаници, 19 од нив (10%), имале најмалку еден позитивен ПЦР тест на SARS-CoV-2 вирусот во период од шест недели, колку што биле следени“, утврдила студијата.
Претходно заразените војници кои повторно се инфицирале имале пониско иво на антитела и помалку неутрализирачки антитела во споредба со претходно заразени војници кои не се заразиле повторно, покажала студијата.
“Иако антителата предизвикани со првата инфекција штитат во голема мера, тие не гарантираат ефикасна активност во неутрализација на коронавирусот или имунитет од идна зараза“, заклучило истражувањето.
“Оваа анализа е спроведена во рамките на планирање на здравствената заштита на војниците од КОВИД-19. Главно беа опфатени машки војници на возраст од 18 до 20 години, по двонеделен домашен карантин, без здравствен надзор“, се додава во научниот труд.
Друга студија, објавена во март во списанието утврдила дека повеќето лица кои прележале КОВИД-19 се заштитени од нова инфекција најмалку шест месеци, но и дека повозрасните лица се посклони кон нова зараза во споредба со младите.
