Поголемиот број на болни од КОВИД-19, примени во американските болници во првите месеци од пандемијата, добивале антибиотици и пред да им се потврди дека кај нив постои некоја бактериска инфекција, покажало истражување објавено завчера.
Студијата што ја спровел Pew Charitable Trusts покажува дека антибиотиците прекумерно се препишувале од февруари до јули 2020 година, додека лекарите се обидувале да ги лекуваат пациентите во моменти кога немаше многу можности за лекување на коронавирусната болест – КОВИД-19.
Антибиотиците не делуваат на вируси, а се препишуваат за лекување на секундарни бактериски инфекции.
“Она за кое на крајот сме загрижени е што тие податоци би можело да значат долгорочно во борба против развојот на резистенција на антибиотици“, вели Дејвид Хун, директор на проектот за отпорност на антибиотици.
Со студијата биле опфатени 5838 хоспитализирани болни и таа укажува на ризикот од непотребно препишување антибиотици што би можело да ја забрза појавата на микроби, отпорни на лекови.
Отпорноста на лекови, меѓу другото е поттикната од прекумерно и погрешно давање на антибиотици и други антимикробни препарати. Бактериите се менуваат за да го избегнат убиствениот ефект од антибиотиците и пронаѓаат начини да го преживеат делувањето на лековите.
Според студијата, најмалку еден антибиотик бил препишан кај 52 проценти од хоспитализираните болни поради КОВИД-19. Бактериско воспаление на белите дробови било дијагностицирано кај 20 проценти од пациентите со коронавирус, а кај девет проценти инфекции на уринарниот тракт, кога препишувањето на антибиотик било оправдано.
Во 96 проценти од случаевите, пациентите почнале да примаат антибиотик во првите 48 часа од приемот во болница.
Податоците покажуваат дека повеќето пациенти кои добиле антибиотик веднаш по доаѓањето во болница, подоцна не добивале дополнителни дози, што укажува на напорите да се ограничи прекумерното давање антибиотици.
