Коронавирусот не предизвикува само температура, кашлица и проблеми со дишењето, туку и невролошки проблеми како главоболка и вртоглавица, покажала најнова студија.
Студијата ја спровеле кинески научници на пациентите во Вухан, изворот на пандемијата, а резултатите ги објавиле во списанието JAMA Neurology. Тие информирале дека една третина од 214 пациенти кои ги прегледале покажувале знаци на влијание на вирусот на нервниот систем.
И претходно имало случаеви да пациенти заболени од КОВИД-19 го губеле сетилото за мирис и за вкус.
“Тие симптоми укажуваат на тоа дека со болеста на некој начин бил зафатен и мозокот. Но, малку се студиите за влијанието на коронавирусот на мозокот на пациентите. Се уште тапкаме во темница“, коментирал специјалистот за инфективни болести Бернд Салзбергер од универзитетската болница во Регенсбург, Германија.
Студијата од Вухан се темелела само на историјата на болеста, лабораториските наоди и радиолошки испитувања кај 214 пациенти.
Според дневните извештаи на Институтот за јавно здравје на РСМ, и пациентите во земјава кои се позитивни на КОВИД-19, освен зголемена телесна температура и кашлица, кои како симптоми ги пријавуваат во над 60% од случаевите, кај 10-15% од сите дневно регистирирани заразени со новиот коронавирус се евиденитра и постоење на симптом главоболка, и поретко малаксалост и вртоглавица.
Неврологот Линг Мао од факултетот за наука и технологија во Хуазхонг, напишал дека кај 78 пациентти (36,4%) се воочени невролошки потешкотии. Најчесто станувало збор за вртоглавица и главоболка. Истовремено 12 од нив го изгубиле сетилото за вкус, а 11 за мирис. Шестмина пациенти преживеале и мозочен удар.
Но, кинеските научници не се сигурни дали тие симптоми се последица на самата болест или дел од одговорот на организмот на воспалителните процеси.
